Friday, January 27, 2023

यी स्थानीय तह, जहाँ स्वतन्त्र उम्मेद्वारले अरुलाई पछि पारे

विराटचोकः हिजो भएको स्थानीय तहको निर्वाचनमा संघीय राजधानी काठमाडौंसहित देशका केही नगरपालिकामा स्वतन्त्र उम्मेद्वारले अरु उम्मेद्वारलाई प्रारम्भिक मत परिणाममा पछि पारेका छन् । धरान, धनगढी, जनकपुर, धुलिखेल, बर्दिबासलगायतका नगरपालिकामा स्वतन्त्र उम्मेद्वारले अरुलाई उछिनेका हुन् ।

काठमाडौंमा स्वतन्त्र उम्मेद्वार बालेन्द्र साहले १५७ मत ल्याउँदा नेकपा एमालेका केशव स्थापितले १०९ र नेपाली कांग्रेसका सिर्जना श्रेष्ठले ९७ मत ल्याएका छन् ।

धनगढी उपमहानगरपालिकामा स्वतन्त्र उम्मेद्वार गोपाल हमालले ५५ मत ल्याउँदा नेपाली कांग्रेसका नृपबहादुर बडले २२ र नेकपा एमालेका रणबहादुर चन्दले २ मत पाएका छन् ।

सुनसरीको धरान उपमहानगर पालिकामा स्वतन्त्र उम्मेदवार हर्क साम्पाङले ३३ मत ल्याउँदा नेपाली कांग्रेसका किशोर राईले ३१ र नेकपा एमालेकी मञ्जु भण्डारीले १६ तथा राप्रपाका नरेश शाक्यले ३ मत पाएका छन् ।

धनुषाको जनकपुर उपमहानगर पालिकामा स्वतन्त्र उम्मेद्वार मनोजकुमार साहले २५९ मत पाएका छन् । गठबन्धनका उम्मेद्वार जनता समाजवादी पार्टीका लालकिशोर साहले ३६ मत मात्रै पाएका छन् । उनी निवर्तमान मेयर हुन् । कांग्रेसले जसपाका उम्मेदवारलाई समर्थन गरेपछि मनोज स्वतन्त्र उम्मेदवार बनेका थिए ।
काभ्रेको धुलिखेलमा स्वतन्त्र उम्मेदवार विदुरबहादुर बस्नेतले ५७२ मत ल्याउँदा एमालेका उम्मेद्वार निवर्तमान मेयर अशोककुमार ब्याञ्जुले ४०५ मत ल्याएका छन् । गठबन्धनबाट नेकपा एकीकृत समाजवादीका दयासागर श्रेष्ठले १८ मत ल्याएका छन् ।

महोत्तरीको बर्दिबास नगरपालिकामा स्वतन्त्र उम्मेदवारी दिएका प्रह्लादकुमार क्षेत्रीले ३४५ मत ल्याएका छन् । एमाले उम्मेदवार टेकबहादुर बलम्पाकीले २५६ मत ल्याएका छन् । नेकपा माओवादी केन्द्रका राजु खड्काले १५६ र नेपाली कांग्रेसका चिरञ्जीवी हमालले १० मत पाएका छन् ।

जुम्लाको चन्दनाथमा स्वतन्त्र उम्मेदवार राजुसिंह कठायतले ३६७ मत ल्याएका छन् । कांग्रेसका पदमबहादुर शाहीले १९२, माओवादीका जीवनबहादुर बुढ्थापाले १६१ र एमालेका धर्मेन्द्र रोकायाले ७६ मत ल्याएका छन् ।

धेरै पढिएको
- Advertisment -
- Advertisment -

- Advertisment -

विराट रिर्पाेट